Kitto Merkatari Elkarteak eta Lekeitioko Udalak hitzarmena berritu dute
2024rako hitzarmena sinatu dute, herrian "hobeto bizitzeko" helburuagaz.
Argazkia: Lekeitioko Udala. Joan den astean elkartu ziren Kitto Merkatari Elkarteko ordezkariak eta Lekeitioko Udaleko ordezkariak hitzarmena berritzeko asmoz; hala, 2024rako hitzarmena sinatu dute bi aldeek. “Herrian hobeto bizitzeko, herriko merkataritza osasuntsu behar dugu”, adierazi du udalak.
Herriko ekonomia sustatu, elkarlana indartu eta herriko bizi kalitatea bultzatzeko asmoz, udalak konpromisoa hartu du estrategikotzat jotzen dituen ekintzen zati bat finantzatzeko; ekintza horiek egiteko 38.000 euroko diru laguntza jasoko du Kittok.
Era berean, hitzarmena sinatuta lortu nahi dituzte hiru helburu ere zehaztu dituzte. Alde batetik, herriko merkataritza eskaintza erakargarriagoa izatea lortu nahi dute, beste herri batzuetara nahiz inguruko merkatal zentroetara bideratzen den gastua saihestu eta herriko merkatal jarduera bultzatzeko. Urteko planean zehaztutako ekintzen kudeaketa eraginkorra izatea da beste helburuetako bat, udalaren eta elkartearen arteko indarra eta koordinazioa bermatzeko asmoz. Azkenik, Kittoren etorkizuna ziurtatu nahi dute, eta baita etorkizunean herriko saltoki guztien ordezkari izatea lortzea ere.
