Sortzaile gazteengana hurbildu nahi du 47. Euskal Zine Bilerak
Urriaren 16tik 21era ospatuko dute jaialdia, eta belaunaldi berriak ikus-entzunezkoetara hurbiltzea da aurtengo helburuetako bat. Euskal Zinemaren Begirada Itziar Ituñok jasoko du. Nerea Ibarzabal egongo da sail ofizialeko epaimahaikideen artean.
Aurten Lekeitioko Euskal Zine Bilerak 47 urte beteko dituen arren, berritasunez beteta dator. Beti berria den zinea leloagaz aurkeztu dituzte aurten lehiaketaren nondik norakoak, gaur [urriak 10], Lekeition. Beste urte batez, euskal ikus-entzunezkoen erakusleiho bihurtuko da Lekeitio, aurtengoan, urriaren 16tik 21era.
Euskara hutsez egiten den jaialdirik zaharrena da Euskal Zine Bilera, eta besteren artean, horrek erreferentziazko espazioa izatea ahalbidetu du: “Euskaraz egindako zinearentzako topagunea izan da hasieratik, eta euskal ikus-entzunezkoen erreferentziazko plaza 1978tik. Zinema maite zuten gazte batzuek euskara arnastearen beharra sentitu zutenean sortu zen”.
Gazte haiei egin nahi die keinu, hain zuzen ere, aurtengo jaialdiak. Helburu argi bat dutela adierazi dute antolatzaileek: “Belaunaldi berriak ikus-entzunezkoen alorrera gehiago hurbiltzea bilatuko du aurtengo jaialdiak. Zine berria egin eta istorio berriak kontatu nahi dizkiguten sortzaile gazteengan pausatu nahi genituzte, aurten, Euskal Zine Bileraren begiak. Begirada guztietatik, beti berria den zinea“.
Hala, proiekzio, solasaldi eta tailerren bitartez landuko dituzte euskal zinemagintzaren ertz guztiak. Jaialdiaren erdigunea, baina, Sail Ofizialeko lehiaketa izango da. Aurten hogei film labur proiektatuko dituzte, eta denak Urrezko Antzarra lortzeko lehian ariko dira: “Horien artean, lan ausartak eta berritzaileak aurkituko ditugu”. Film onenak jasoko duen Urrezko Antzarraz gain, zuzendaritza onenaren saria, gidoi onenarena, 2000. urtetik aurrera jaiotakoentzako Benito Ansola saria eta EITB ikusleen saria banatuko dituzte.
Film, zuzendari eta gidoi onenaren irabazleak izen handiko hiru epailek aukeratuko dituzte. Ainara Elgoibar zinemagile mungiarra, Martxelo Rubio aktore donostiarra eta Nerea Ibarzabal bertsolari markina-xemeindarra ariko dira epaile lanetan. Hala, sari banaketa ekitaldia urriaren 19an egingo dute, 19:30etik aurrera, Ikusgarrin, Ana Goitia eta Jon Garatek aurkeztuta.
‘Zortzitik infinitura’ dokumentala proiektatuko dute urriaren 20an; ostean, solasaldia egongo da egileekin.
Izen handiko aktore bat ere hartuko du jaialdiak: Itziar Ituño. Euskal Zine Bilerak urtero ipintzen du begirada euskal ikus entzunezkoen alorrean “ekarpen berezia” egin duen eragile edo pertsona batengan, eta aurten, “euskaraz ekin dion aktore unibertsal bati” egin nahi izan diote “merezi duen aitortza”. Hala, Ituñoren ibilbidean ipiniko dute fokua: “Ibilbide luze honetan, euskal ikus-entzunezkoetan eta euskaran izan duen eragina aintzakotzat hartu eta bere lana balioan ipiniko da”. Euskal Zinemaren Begirada jasoko du Ituñok, “lurralde, zein, hizkuntzaren mugak igaro dituen aktore euskaldun eta euskaltzaleak”. Sari banaketa ekitaldian banatuko dute Euskal Zinemaren Begirada ere.
Lekeitiotik, infinitura. Jaialdiaren muina diren ekintzetatik haratago, berritasun eta berezitasun ugari dakartza aurtengo jaialdiak. Lekeitiarrentzat bereziena, urriaren 20an helduko da: Naia Laka eta Xabier Villalbaren Zortzitik infinitura dokumentalaren proiekzioa egongo da, 17:30ean, Ikusgarrin. Dokumentala emateagaz batera, solasaldia eskainiko dute bi egileek, Miren Agur Meabe dokumentalaren gidariarekin batera. Benito Ansola zinemagilearen bizitzatik abiatu, eta euskal zinemagintzaren historian murgilduko dira ikus-entzuleak.
Berritasunen artean, aldiz, bertsolaritzak jaialdian izango duen presentzia egongo da. Ibarzabal bertsolariak epaile lanetan izango duen eraginagaz batera, “euskal kulturgintzaren alor bereiztu bat” hartu dute ardatz bezala: “Jaialdiak egitarau zabala izango du, eta horietako askok bertsolaritzaren alorra jorratuko dute”. Horren adibiderik onena, urriaren 19an egingo dute Bertso-zine gauaizango da. Zinemaren alorra bertsotan lantzeko asmoz, urriaren 18an Xabat Galletebeitia, Onintza Enbeita eta Miren Amuriza bertsolariak igoko dira Sociedad Recreativako oholtzara, Ainhoa Urien gai-jartzailearen gidaritzapean. Sarrerak salgai daude jada zinebilera.eus web orrian eta Lekeitioko kultur etxeko harreran (arratsaldez).
Sustraiak ahaztu barik. Belaunaldi berriak ikus-entzunezkoetara hurbiltzea ere aurtengo jaialdiaren ardatzetako bat da, eta horretarako, arlo pedagogikoa landuko duten hainbat ekimen egingo dituzte. Euskaltzaleen Topagunearekin eta Lekeitioko ikastetxeekin elkarlanean, urriaren 16an Harrobia izeneko egitasmoa eroango dute aurrera: “Belaunaldi berriei euskarazko zinema hurbiltzeko ekimena da. Hainbat tailerretan antolatuko dira aurten, eta hurrengo urtean, ikus-entzunezkoen esparruan sormena sustatuko duten hainbat ekintza burutuko dira ikasleekin”. Era berean, Arropaineko Arraguarekin ere beste egitasmo bat antolatu dute urriaren 18rako: Klixka esperimentazio espazioa. Bertan, hainbat sorkuntza tailer egin ahalko dituzte gazteenek.
Zinemagintzaren munduan sartu, eta horretan lanean hasi nahi dutenek ere izango dute euren tokia jaialdian. Urriaren 19an Ander Barinaga-Remeneteria Galapan ekoiztetxeko kideak eta Sara Blanco Al Borde Films ekoiztetxeko kideak euren esperientziak plazaratuko dituzte: “Mikele Landa zinemagile eta kazetariaren dinamizazioarekin, izan dituzten erronka nagusiak ezagutu eta ikuspegi guztiak uztartuta bertako zinema industriaren erradiografia bat egitea da asmoa”. Hala, ekoizpengintzaren inguruko nozioak eta ekoiztetxe bat martxan ipintzeko informazioa jasoko dute bertaratzen direnek.
IKUSI ARGAZKI GALERIA ZUZENEAN
Gazteengan begirada ipini duten arren, sustraiak ez dituzte ahaztuko Euskal Zine Bileran. Kamera digitalak alde batera utzi, eta analogikoetan analogikoenak landuko dituzte urriaren 20an. Zine-Lab laborategiarekin elkarlanean, Atzo8 izeneko egitasmoan ikus-entzunezko ondare analogikoa landuko dute Eskua eta makina: kamera estenopeikoa lantegiagaz. Egun guztiko lantegia izango da, eta arratsaldean egunean zehar egindako lanak proiektatuko dituzte, Ikusgarrin. Tailerra doan den arren, izena eman behar da zinebilera.eus atarian.
Jaialdiagaz amaitzeko, urriaren 21ean lehiaketako palmareseko filmak proiektatuko dituzte, eta 19:00etan eskainiko duten Levante filmaren proiekzio eta emanaldiagaz itxiko dute jaialdia; bertan izango dira Zinegoak jaialdiaren antolatzaileak eta Andraetxeko kideak ere.
