Abian da Mendexako udal egutegia osatzeko argazki lehiaketa
Urriaren 31an [eguena] amaituko da lanak aurkezteko epea. Sari banaketa abenduaren 25ean egingo da, urteroko argazki zaharren erakusketan.
2023ko Mendexako udal egutegia osatzeko argazki lehiaketako irabazleak: David Muruaga, Eneko Muruaga eta Jose Ramon Txopitea. Argazkia: Leixarra Elkartea. Urtero legez, udal egutegia osatzeko argazki txapelketa abiatu dute Mendexako Udalak eta Leixarra Elkarteak, Mendexa eta mendexarrak gaitzat hartuta. Urriaren 31an amaituko da lanak aurkezteko epea, eta argazkilari profesionalak ez direnei zuzenduta dago.
Lehiaketara aurkezten diren argazkiak horizontalak eta aurretik argitaratu gabekoak izan beharko dira. Parte hartzaile bakoitzak gehienez hiru argazki aurkeztu ditzake, eta argazkia zein tokitan ateratako den adierazi beharko da, argi ez dagoen kasuetan.
Lanak leixarraelkartea@gmail.com helbidera bidali beharko dira, eta mezuan egilearen izena, aurkezten diren argazkien izenburuak eta argazkia non aterata dagoen zehaztu beharko da. Horrez gain, argazki bakoitzak bere izenburua izan beharko du. Argazkiak JPG formatuan aurkeztu beharko dira, eta gutxienez 3600 x 3000 pixelegaz.
Epaimahaia azaroan zehar elkartuko da eta Mendexako web orrian emango dute irabazleen berri. Sariei dagokionez, abenduaren 25ean banatuko dira. urtero egiten den argazki zaharren erakusketan, 13:00etan. Lehenengo sarituak 100 euro eskuratuko ditu, bigarrenak 80 euro eta hirugarrenak 50 euro. “Partaide bakoitzak sari bakarra irabazi dezake”.
Antolatzaileek adierazi dutenez, aurkeztutako argazkiak erakusteko eta kopiatzeko eskubidea izango dute, “lanak udalaren kultur ondare izango dira, hau da, erakutsi eta kopiak atera ahal izango dira”. Epaimahaiak zalantzazko egiletza duten, pertsonen duintasunaren aurka egiten duten eta beste lan batzuen plagiotzat hartzen diren lanak deskalifikatzeko erabakia hartu dezake.
