Irrintzi Topaketak antolatu dituzte Aulestin, lehenengo aldiz
Aulestin irrintziarekiko zaletasuna sortzea da topaketen helburua, eta irrintzia bera, erdigunean jartzea. Urriaren 31n [eguena] amaituko da izena emateko epea.
Lehenengo Irrintzi Topaketak antolatu ditu Aulestiko Udalak, herrian ume eta gazteen artean irrintziarekiko zaletasuna sortu eta irrintziari protagonismoa emateko helburuagaz: “Irrintzi lehiaketak urte askotako tradizioa du Aulestin, baina beti, pertsona berdinek parte hartzen dute. Beraz, topaketa hauekin herriko ume zein gazteengan irrintziarekiko zaletasuna piztea da helburua”.
Topakeak azaroaren 15ean [barikua] izango dira, Udal Areto Nagusian, 17:00etatik aurrera. Lorea Zarragoikoetxea, Ainara Ituiño eta Nerea Agirre herriko irrintzilariak izango dira irrintzia botatzeko teknika eta aholkuak emango dituztenak, eta guztira, ordu erdiko saioa izango da.
Izena ematea. Izena ematea zabalik dago, eta urriaren 31n [eguena] amaituko da epea, eta honetarako, Aulestiko Udaletxera deitu beharko da: 94-627 90 05. Sei urtetik gorako edonork eman dezake izena. Apuntatzen diren partaideen artean taldeak osatuko dira, adina kontuan hartuta.
