Eskualdeko sukaldari eta ekoizleak Lekeition elkartu dira
Bizkaiko Sukaldarien Bilkurako kideek euren proiektua aurkezteagaz batera, eskualdeko sukaldari eta ekoizleen datu basea osatu dute. Antolatzaileek bilkura "arrakastatsua" izan dela nabarmendu dute.
Bizkaiko Sukaldarien Bilkurak Bisubi Fundazioaren aurkezpena egin zuen astelehenean [abenduak 9] Lekeition. Fundazioa aurkezteaz gain, Lea-Artibaiko sukaldari nahiz ekoizleen datu basea osatzea zen helburua, eta “arrakastaz” lortu dutela adierazi dute antolatzaileek.
“Balorazio oso positiboa egin dugu. 50 lagunetik gora elkartu ginen, eta gutxi gorabehera, apur bat toki denetatik etortzea lortu genuen. Gure asmoa eskualdeko sukaldari eta ekoizleen datu basea osatzea zen, eta fundazioko bazkide izan nahi badute ateak zabalik ditugula adieraztea”, adierazi dute fundazioko kideek. Bertaratu ziren ostalari eta ekoizleek ere, gustura hartu zuten aurkezpena: “Jaso dugunaren arabera, proiektua asko gustatu zitzaien. Arrakasta izan zuen eta jendeak interesa erakutsi zuen. Polita izan zen, eta gauza gehiago egiteko gogoz geratu gara”.
Datu basea osatu, harremanak estutu eta bertoko produktuen dastaketa egiteagaz batera, Bisubi Fundazioaren asmo eta helburuak ere aurkeztu zituzten Lekeition: “Bisubi sukaldari eta ekoizleok gure artean laguntzeko elkartea da. Dauden beharren arabera, Bisubiren bitartez laguntza lortu dezaten. Ez da soilik izardun jatetxeentzako, baizik eta, sukaldari nahiz ekoizle denentzat: jatetxeetakoak, janari prestatutak egiten dituztenak, ortuko produktuak saltzen dituztenak… denetarik”.
Bestalde, Bisubi fundazio bat denez geroztik, alde solidarioak ere garrantzia handia du kideentzat. Hori horrela, urtero hainbat ekimen solidario egiten dituzte: “Alde solidadioan, esaterako, Balmasedako putxera kofradiarekin Santo Tomas jaira joaten gara, eta 5.000 errazio indaba prestatu eta saltzen ditugu. Hor lortutako dirua, iaz adibidez, Aspanovas elkartera bidali genuen”.
Hari horretatik tiraka, jatetxe solidario bat ere zabaldu nahi dute. Gaur gaurkoz, Bilbo erdigunean zabaltzea da asmoa, Utopia izenagaz: “Oraindik proiektua guztiz finduta ez dagoen arren, jatetxe solidario bat izango da. Gizarte bazterkeria jasaten dutenek ondo jateko aukera edukitzea da helburua. Horretarako, besteak beste, Bizkaiko Foru Aldundiarekin ari gara lanean”.
Fundaziora batu nahi dutenek “ateak zabal-zabalik” aurkituko dituzte. Zalantzak, galderak nahiz informazioa eskatu nahi dutenek Bisubiren web orritik egin dezakete. Era beran, fundazioaren parte izan nahi dutenek ere, bertatik egin dezakete eskaera, doan.
