Arantza Zuluetari babesa erakutsi diote lekeitiarrek
Euskal Herrian bakearen, bizikidetzaren eta agertoki demokratikoaren alde euskal eragile gehienak egiten ari diren bidea nabarmenduz, gatazka politikoari zein preso politikoen aferari irtenbide demokratikoa emateko ordua dela berretsi dute Lekeition.
13/13 auziari dagokion Espainiako Auzitegi Gorenaren erabakiaren aurrean, Arantza Zuluetari babesa eta maitasuna adierazteko, kalera atera ziren lekeitiarrak atzo arratsaldean [urtarrilak 9]. Eskolapean deitutako elkarretaratzea jendetsua izan zen, eta beste hainbatetan egin modura, elkartasun osoa adierazteagaz batera, auziaren kontrako salaketa irmoa helarazi zuten. Zulueta ere bertan egon zen, eta besarkada bero artean hartu zuten.
Espainiako Auzitegi Gorenak zazpi urte eta erdiko espetxe zigorra berretsi dio Zuluetari eta lau urtekoa, berriz, Jon Enparantzari, euren helegiteak ez baitituzte onartu. Naia Zuriarraini eta Iker Sarriegiri, ostera, zigorrak arindu dizkie; Zuriarraini urte bira jaitsi diote zigorra, eta urte biko inhabilitazioa ere jasoko du, kargu publiko batean jarduteko; Sarriegiri urte eta erdira jaitsi diote berea, inhabilitazio beragaz.
“Kezkatuta eta haserre” agertu ziren atzo Zuluetaren herrikideak. Bertan jakinarazi zutenez, herenegun arratsaldean heldu zitzaien abokatuei Auzitegi Gorenaren ebazpena, eta behin hori jasota, Audientzia Nazionalera eraman behar dute epai hori, “zigorrak exekutatu ditzaten”. Ondoren, zigortutako bakoitzari epe bat jakinaraziko zaio espetxean aurkeztu dadin: “Naia Zuriarrainen eta Iker Sarriegiren kasuan, zigorraren suspentzioa eskatuko da, legeak horrela ahalbidetzen duelako; zigor handiagoak jaso dituztenen kasuan, gure herrikide den Arantzaren eta Jon Enparantzaren kasuan, espetxean sartu beharko dira. Bi kasu horietan lehentasuna izango da ahalik eta eperik laburrenean berriro ere kalean egotea”. Eta horretarako beharrezkoa den bultzada juridiko zein politikoa martxan dagoela adierazi zuten.
Hain zuzen ere, jendartearen indarra beharrezkoa dela iritzita, beharrezko baldintzak sortzeko deia egin zuten, baita gaur arratsaldean Bilboko kaleak betetzeko ere: “Kezkaz eta oso haserre hartu dugu berria, baina, orain, badakigu zer dagokigun; zigortuei gure babes osoa emateagaz batera, argi izan behar dugu berriro gure artean egon daitezen bultzatu behar dugula, horretarako beharrezkoak diren baldintzak sortuz. Eta bide horretan lehenengo urratsa biharkoa izango da. Bihar arratsaldean bete ditzagun Bilboko kaleak, bete ditzagun euskal preso, iheslari eta deportatu politiko guztiak etxean egon daitezen, eta berriro horrelako egoerarik pasa ez dadin”.
Azken hamarkada luzean Euskal Herrian bakearen, bizikidetzaren eta agertoki demokratiko baten alde euskal eragile gehienak egiten ari diren bidea “agerikoa” dela gogoratu zuten atzo Lekeition. Euren hitzetan, Euskal Herria aurrera doa, gatazka politikoari irtenbide demokratikoa emateko baldintza berriak sortuz: aliantza berriak, adostasun zabalak, ezberdinen arteko akordioak, biktima guztien aitortza eta abar luze bat. “Egun hauetako berriak, ordea, atzera begira jartzen gaitu beste behin ere, iraganera, existitzen ez den errealitate zahar batera begira. Estatu sakona eta bere makineria juridiko-legalak indarrean darrai euskal herritarren kontra jotzeko, ezkerreko independentismoaren kontra jotzeko, Euskal Herriaren kontra jotzeko”, gaitzetsi zuten.
Euskal preso, iheslari eta deportatu politikorik gabeko etorkizuna lortzeko bidean, espetxeak husteko garaia dela berretsi zuten Eskolapean biltutakoek: “Gaurkoan, berriz ere, kezka eta haserrea adierazi nahi ditugu, kezka eta haserrea hurrengo egun eta asteetan gertatu daitekeenarekiko. Gure herria aspalditik ari da indar guztiz lanean euskal preso, iheslari eta deportatu politikorik gabeko etorkizuna bilatzen”. Azpimarratu zuten bezala, horretan ari da presoen kolektiboa bera ere: “Espetxeak husteko garaia dela ozen aldarrikatzen dugun honetan dator epaia; euskal preso, iheslari eta deportaturik gabeko herria aldarrikatzeko, milaka eta milaka euskal herritar biltzen dituen manifestazio nazionalaren bezperan. Espetxeak husteko garaia da, ez haiek betetzen jarraitzekoa, eta ez daukagu dudarik lortuko dugula. Etsaia tematia da, gure herria are tematiagoa, ordea. Ezelako errepresio, eraso edo espetxeratzeak mingarria izanagatik ere, ez gaitu gure bidetik aterako. Gure herriaren aldeko askatasunerantz bidea egiten jarraituko dugu, preso, iheslari eta deportatu politikorik gabeko etorkizunerantz bidea egiten jarraituko dugu, bizikidetza eta askatasun agertoki baterantz bidea egiten jarraituko dugu.” Gatazka politikoari zein preso politikoen aferari irtenbide demokratikoa emateko ordua dela berretsi zuten, eta ez errepresioan eta espetxeratzean “tematzekoa”.
