Lekeitiok Pasajerua'26 aurkeztu du itsas memoria berreskuratzeko proiektu parte hartzailea
Barikuan [maiatzak 8] Kultur Etxean aurkeztutako egitasmoak ontzi tradizional baten eraikuntza kolektiboa eta herriko itsas ondarearen memoria bilketa sustatuko ditu.
Lekeitiok joan den barikuan [maiatzak 8] aurkeztu zuen Kultur Etxean Pasajerua ’26 proiektua, herriko itsas memoria berreskuratu, dokumentatu eta belaunaldi berriei transmititzeko sortutako ekimena. Itsasmuseumek bultzatutako egitasmoak Eusko Jaurlaritzaren laguntza eta Lekeitioko Udalaren elkarlana ditu.
Proiektuaren ardatz nagusia Pasajerua izeneko ontziaren eraikuntza parte hartzailea izango da, San Antolinetako tradizioari eta herriko itsas nortasunari estuki lotutako ontzia. Eraikuntza prozesuak ontzigintza tradizionaleko teknikak berreskuratzea eta komunitatearen parte hartzea sustatuko ditu.
Horrez gain, Astillero Mendietari, itsas bizimoduari eta Lekeitioko portuari lotutako testigantzak, argazkiak eta dokumentuak bilduko dira. Herritarrek euren oroitzapenak partekatzeko edo ontziaren eraikuntzan zuzenean parte hartzeko aukera izango dute.
Pasajerua ’26 egitasmoak iraganeko ondarea gaur egungo komunitatearekin lotu nahi du, Lekeitioko itsas nortasuna bizirik mantentzeko eta etorkizunera begira sendotzeko.
