Adineko emakumeak omendu ditu Arantza Ibarrak 'Notas de vida' liburuan
Adinkeriaren aurkako mezua eta adineko emakume nagusien aitortza ditu ardatz Arantza Ibarrak argitaratu berri duen 'Notas de vida' liburuak. Zapatuan [ekainak 20] aurkeztuko du Ondarroako Unanue Udal Musika Eskolan.
Arantza Ibarrak liburu berria kaleratu du. Arantza Ibarra. Arantza Ibarrak Con M de Mujer argitaletxeagaz argitaratutako Notas de vida liburua aurkeztuko du zapatuan [ekainak 20] Ondarroan, 13:00etan, Unanue Udal Musika eskolan. Liburua adineko emakumeak omentzeko erabili du, eta aurkezpena bera ere helburu horren isla izango da; izan ere, literatura eta musika uztartuko dituen saio “berezia” prestatu du, udalerriko beste zenbat emakume musikarirekin batera. Ekitaldiko mezua argia izango dela azpimarratu du Ibarrak: “Adineko emakumeak omendu eta ikusgarritasuna eta ahotsa eman”.
Urte luzez buruan izan duen ideiari forma eman dio Arantza Ibarrak aurkeztu berri duen lanagaz. Egilearen esanetan, adineko emakumeei eskainitako omenaldia da liburua, baina baita gaur egungo gizarteari egindako kritika ere: “Gizarteak gaur egun umetasuna eskatzen duela dirudi. Lehen gaztetasuna zen idealizatuta zegoena, baina gaur egun are eta gazteagoa izan behar dugu baloratua izateko. Aurpegia, gorputza edo sare sozialetan ikusten duguna edaten dugu, eta emakumeok, batez ere adinean aurrera goazenok, gehiago pairatzen dugu presio hori. Beraz, nire bizitzaren parte izan diren adineko emakumeak omentzeaz gain, kritika egin nahi izan diot adinkeriari”.
Lorea da istorioko protagonista. 69 urteko emakumea da, ondarrutarra eta piano jotzailea. Bilbon bizi bada ere Ondarroara itzuliko da kontzertu “berezi” bat eskaintzera. Ezkonduta egon zen arren, gaur egun, banatuta dago, alaba eta ilobak ditu, bi ahizpa, lagunak, eta bisexuala da. Horrez gain, 108 urteko izeba bat ere badauka. Gainera, kontakizunean musikak pisu handia izango du. Loreak emango duen kontzertua da istorioaren ardatzetako bat, eta pieza bakoitza bere bizitzako emakume bati eskainiko dio, bakoitzaren atzean dagoen istorioa azalduz. “Liburuko ideia hori errealitatera eramango dugu zapatuan. Ni ondarrutarra izanik eta musika munduagaz lotura estua edukita, Eli Andrinua nire solfeoko irakasle ohiagaz eta gaur egungo lagunagaz hitz egin nuen ekitaldi berezi bat antolatzeko. Horrela, aurkezpenean liburuko pasadizoak eta musika uztartuko ditugu”.
Mari Karmen Arrietak, Rakel Eluk eta Eli Andrinuak hartuko dute parte, eta idazleak atzeak zabalik utzi ditu bertan jotzera animatu nahi duten emakumeentzat: “Musikak izango du protagonismo handiena. Musikaren bidez mezua zabaldu nahi dugu, eta adineko emakumeak benetako protagonista bihurtu nahi ditugu”.
Ekitaldia, gainera, data “berezian” izango da; izan ere, ekainaren 21a Europako Musikaren Eguna dela azpimarratu du Ibarrak. Ordubete inguruko saioa izango da, eta bertan liburuak erosteko aukera ere egongo da.
Idazleak aitortu du ilusio handiz bizi duela lehen aurkezpena: “Oso hunkituta nago. Oso polita iruditzen zait zapatuan egingo duguna. Parte hartuko duten emakumeak urduri daudela esan didate, baina baita pozik eta hunkituta ere. Espero dut jendea gerturatzea, zarata pixka bat egitea eta mezua ahalik eta gehien zabaltzea”.
