Zabalik dago Karmen jaietako kroserako izen ematea
Ekainaren 27an [zapatua] egingo da kros herrikoia, eta dagoeneko izena eman daiteke; lasterketa egunera arte aukera egongo da izena emateko.
Markina-Xemeingo Karmen jaien egitarauaren barruan, Aringa-Aringa Kirol Klubak antolatuta, krosa egingo dute. Bakarka nahiz mistoan aritzeko aukera egongo da, eta parte hartzaileek 7,5 kilometroko ibilbidea egin beharko dute, 19:30ean hasita. Izena emateko epea ekainaren 27ra artekoa izango da, hau da, lasterketa egunera artekoa. 12 euroko prezioa izango du lasterketa indibidualak eta 24 eurokoa lasterketa mistoak.
Gizonezko nahiz emakumezkoek banaka aritzeko aukera edukiko dute, baina baita taldeka ere, bikote mistoetan. Horrenbestez, horren araberako sariak banatuko dituzte. Lehenengo hiru garaileek txapela eta 50 euroko ordainsaria jasoko dute; bigarren sailkatuek, ordea, oroigarria eta 30 euroko saria; podiumeko hirugarrenek, aldiz, oroigarria eta 20 euroko saria. Ez hori bakarrik: lehenengo hiru emakumezko zein gizonezko markina-xemeindarrei ere saria emango diete; oroigarri bana jasoko dute.
