Ispasterrek Marije Uranga omenduko du domekan
Domekan [ekainak 28] 12:15ean "Marijeren Txokoa" izendatuko dute, lore eskaintza eta musikarekin lagunduta.
Ispasterrek omenaldia egingo dio Marije Uranga auzokideari domekan [ekainak 28], herritarrek zioten maitasunaren erakusle. Ekitaldia 12:15ean izango da, mezaren ostean, haritz zaharraren azpian, eta haren oroimena eta urte luzez egindako lana aitortzea izango du helburu. Uranga bereziki ezaguna zen haritz zaharraren inguruko lorategia zaintzeagatik. Urteetan, bertako loreak, landareak eta ingurunea “mimo handiz” zaindu zituen, ureztatze lanak eta mantentze lanak eginez. “Haren dedikazioari esker, herriko txoko hori zainduta eta edertuta egon da denbora luzez”.
Omenaldiaren barruan, lore berriak eramango dituzte, eta ekitaldian bertan landatuko dira auzokidearen omenez. Horrez gain, musika ere izango da protagonista. Ispasterko gitarra irakasleak hainbat abesti eskainiko ditu, tartean Benito Lertxundiren kantu ezagun batzuk. Ekitaldian hitz batzuk ere eskainiko dituzte senideek, lagunek eta herritarrek. Gainera, Urangaren “oroimena betiko gordetzeko asmoz”, Marijeren Txokoa izeneko gune berezia aurkeztuko dute. Horretarako, egurrezko kartel edo plaka bat jarriko dute, bere izena eta herriarentzat izan duen garrantzia gogorarazteko.
Antolatzaileen arabera, 50 bat lagun biltzea espero da. Senideez eta lagunez gain, herriko bizilagun ugari ere bertaratzea aurreikusten da, Uranga oso pertsona estimatua baitzen Ispasterren.
