IV. Igoera Herrikoien Liga, zortzi geltokigaz eta hastear
Zapatuan [ekainak 27] hasiko dute IV. Igoera Herrikoien Liga, Aixerrotara Igoeragaz. Aurtengo lehiak zortzi hitzordu mantenduko ditu Busturialdea eta Lea-Artibai artean, ekainetik abendura.
Azken urteotan hazi eta egonkortu ondoren, Igoera Herrikoien Liga heltzear da. Zapatu honetan [ekainak 27] ipiniko dute abian kirola, jai herrikoiak eta boluntarioekiko eskertza ardatz dituen txapelketaren IV. ekitaldia; Aixerrotapera Igoera izango da, ohiko modura, lehia hasiko duen hitzordua. Lehen zitaren arduradun Arrolape Mendi Klubak eta Aixerrota Azpi Txokoak Gernika-Lumoko Pasealekutik Aixerrota edo Kosnoaga izenez ezagun den mendiaren tontorrerainoko kilometro biko ibilbide esplosiboa atondu dute, 260 metroko desnibela edukiko duena.
13:00etan hasiko da lehendabiziko lasterkaria korrika. Parte hartzaileek irteera orduko izena eman beharko dute, bost euroren truke. Podiumeko lehen hiru sailkatuek, halaber, sari ekonomikoa jasoko dute Lumon, hurrenez hurren, 50, 30 eta 20 eurokoa izango dena. Gainera, nagusien zein 23 urtez azpikoentzako gazteen sailkapena egongo direla aurreratu dute. Korrikalarien adina zein maila “edozein” izanik ere, antolakuntzak aurreratu du bai lehen lasterketaren, bai lehiaketaren jomuga ez dela inolaz ere “marka kontua izango”: “Parte hartzea, ondo pasatzea eta elkarrekin une bereziak bizitzea izango da garrantzitsuena”.
Ekainetik abendura bitartean, Busturialdeko zein Lea-Artibaiko herri, auzo eta mendiek zortzi geltokiz osatutako lehiaketa egutegia hartuko dute, tokian tokiko eragile sareek zein antolatzaile taldeek prestatuta. Hain zuzen, herrietako jaien aterkipean atondu dituzte, azken urteotan bezala, lasterketarik gehienak. Horrenbestez, jai batzorde, mendi talde eta herrietako eragileak eurak arduratuko dira lasterketa guztien antolakuntzaz; alde horretatik, lasterketa sorta urte osoan kirol, kultur eta herrigintza lanean dihardutenen “omenez” antolatuko dute liga.
Aixerrotapeko azterketaren ostean, Lea-Artibaiko tontorretara lekualdatuko da txapelketa. Uztailaren 12an, Oizko San Kristobal baselizarako maldei aurre egin beharko diete, munitibartarrek prestatzen duten Oizko Ermitara Bertikala lasterketan. Astebete beranduago, hilaren 18an, Berriatuak hartuko du hirugarren hitzordua: Legarmendi Igoera. Abuztua heltzeagaz batera, Busturialdera bueltatu beharko dira lasterkariak, zehazki, Natxitua ingurura: Lapatza Igoera lehiatuko dute abuztuaren 15ean. Ondoren, ia hilabeteko etenaldia edukiko du ligak, irailaren 20a bitarte; egun horretan, Aulestiko eragileen txanda izango da, Santa Eufemi Ermitara Igoera antolatuko baitute.
Handik aste batera, irailaren 26an, Ondarroan Tontorramendi Igoera egingo dute. Txapelketaren azken bi lasterketak urriaren 4an eta abenduaren 6an lehiatuko dituzte: lehendabizikoa Ereñon jokatuko da, Ereñozarrera Igoera; bigarrena, Nikola Deunaren ospakizun egitarauaren barruan, Elantxobek hartuko du, Kaltzadan Gora proba. Egun haren ostean erabakiko dira azken sailkapenak. Azken garaileak, hain zuzen, Irati Zabala gernika-lumotarra eta Xuban Muniozguren markina-xemeindarra izan ziren; biek ala biek bigarren urtez jarraian poltsikoratu zuten liga.
LASTERKETA EGITARAUA
Ekainak 27. Aixerrotara Igoera, Gernika-Lumon.
Uztailak 12. Oizko Ermitara Bertikala, Munitibarren.
Uztailak 18. Legarmendi Igoera, Berriatuan.
Abuztuak 15. Lapatza Igoera, Natxituan.
Irailak 20. Santa Eufemi Ermitara Igoera, Aulestin.
Irailak 26. Tontorramendi Igoera, Ondarroan.
Urriak 4. Ereñozarrera Igoera, Ereñon.
Abenduak 6. Kaltzadan Gora, Elantxoben.
