Gizon bat atxilotu dute Ondarroan, adingabeen aurrean exhibizionismoa egiteagatik
Ertzainek 33 urteko gizon bat atxilotu dute Ondarroan, bere genitalak ukitzen zituen bitartean Arrigorri hondartzan dutxatzen ari ziren neska nerabe adingabeei telefono mugikorragaz argazkiak ateratzeagatik.
Astelehenean, 17:30ak aldera, Ondarroako Arrigorri hondartzan zegoen lekuko batek Ertzaintzari jakitera eman zionez, pertsona bat udalerriko hondartzako dutxetan zeuden lau adingabeei argazkiak ateratzen ikusi zuten, praken barrutik masturbatzen ari zen bitartean.
Ertzaintzaren patruila bat hondartzara joan zen, eta agenteek adingabeekin egiaztatu zuten lekukoak azaldutakoa. Adingabeak 14 urteko lau neska ziren, eta informazioa egiaztatu ondoren, ekintzen egilea seinalatu zutela azaldu du Ertzaintzak. Hala, Ertzaintzak adingabeek seinalatutako gizonarengana jo zuten, eta hauen esanetan, inolako agiri ofizialik aurkeztu ez zuenez, Ondarroako Ertzain etxera eraman zuten identifikatzeko.
Bertan identifikatu zuten 33 urteko gizona, eta bere borondatez utzi zion Ertzaintzari bere telefono mugikorra. Hala, agenteek momentuan egiaztatu zuten adingabeei argazkiak atera zizkiela. Horren aurrean, biktimen gurasoek salaketak jarri zituzten, eta adingabeen aurrean exhibizionismoa egitea leporatuta atxilotu zuten. Ertzaintzak nabarmendu duenez beharrezko polizia eginbideak amaitzean atxilotua epailearen eskuetan jarriko dute.
