Sarrera guztiak agortuta, "oso hunkigarria" izan da 'Berriz etorriko zera' dokumentalaren estreinaldia
Kultur aniztasunaren astearen baitan, zapatuan [maiatzak 9] frontoia bete zuten herritarrek Jon Maiak zuzendutako eta Ondarroako Udalak ekoitzitako dokumentalaren estreinaldiarako. Udal ordezkariek astearen balorazio ona egin dute.
Zapatuan [maiatzak 9] estreinatu zuten dokumentala.Ondarroako Udala Egitarau “bete-betearekin” hasi zuten ondarrutarrek joan den astelehenean [maiatzak 4] kultur aniztasunaren astea, eta zapatuan [maiatzak 9] herriko frontoia bete-beteta eman zieten amaiera asteari. Hamaika ekintza tarteko, zapatuan Berriz etorriko zera dokumentalaren estreinaldiaz gozatu zuten herritarrek. Sarrera guztiak agortuta, ekitaldi “oso hunkigarri” batez gozatu zuten bertaratu zirenek: “Oso hunkigarria izan zen, bene-benetan. Eskerrak baino ez digutu herritarrentzat”.
Jon Maia Soriak zuzendutako eta Ondarroako Udalak ekoiztutako dokumentala izan zen estreinatu zutena, eta Frankismo garaian Ondarroara etorritakoen esperientziak bildu dituzte bertan. Hala, Maiak sare sozialetan adierazi duenez, esker hitzak baino ez ditu ondarrutarrentzat: “Malko, irri, txalo eta besarkadaz bete zen zapatuan pilotalekua. Mila esker Ondarroa egin duzun ariketagatik eta ahaleginagatik. Eskerrik asko zuen bihotza zabaldu diguzuen etorkin guztiei, zuen bizitzako zati intimo horiek gurekin partekatzeagatik. Orain Ondarroaren historian idatziak geratu dira, ondare. Mila esker Ondarroa, 16 urterekin lehen aldiz kantatu nizunetik eman didazun guztiagatik”.
Ikusteko aukerarik barik geratu direnek Kofradia Zaharrean edukiko dute ikusteko aukera; udal ordezkariek jakitera eman dutenez, aurrerago zehaztuko dituzte datak. Era berean, zenbait plataformatara igotzeko asmoa ere erakutsi dute.
Elkarlana. Zapatuko ekitaldiagaz eta dokumentalaren estreinaldiagaz astea “biribildu” zutela adierazi dute udal ordezkariek, baina aurretik ere egon da zer egina herrian, denak ere, herriko ikastetxe, talde nahiz norbanakoekin elkarlanean antolatutakoak. Barikuan [maiatzak 9] Kultura Jaia ospatu zuten Zaldupe eskola publikoan: “Oso aberatsa izan zen, eta oso polita”. Eguaztenean [maiatzak 6], ostera, Maiak Extremaduratik euskarara, barne eta kanpo bidaia hitzaldia eman zuen Kofradia Zaharrean, eta aretoa beteta, hausnarketa “sakonak” egiteko espazioa sortu zen bertan.
Herriko ikastetxeek ere eduki dute euren tokia kultur aniztasunaren astean. Aste guztian ikasleen erakusketa egon da Udal Erakusketa Aretoan, eta Pedro Lasarte Iparragirreren eta Natalia Zubova Kasatkinaren laguntzagaz “lanketa polit-polita” egin dute: “Pedroren eta Natarliaren koordinazioa ezinbestekoa izan da honetarako. Hainbat ikasle ikastetxeetatik joan dira eta azalpenak eman dizkiete. Lanketa polit-polita egin dute aniztasunarekin lotuta”.
Astelenetik eguenera bitartean kultur aniztasun elkarrizketak ere eroan dituzte aurrera Errebala Txikiñe gaztelekuan eta Kofradia Zaharrean, eta ikasleen erantzunagaz pozik geratu dira antolatzaileak: “Eduki ditugun elkarrizketetan herriko hiru ikastetxeak oso inplikatuta egon dira. Denok ikasi dugu hortik”.
