Bihotz taupadez bete dute Elkartasun Eguna
Etxeratze prozesua amairara arte eroateko premia azaleratu dute gaur, ekimenez ekimen. Manifestazio jendetsuak zeharkatu ditu eguerdian Ondarroako kaleak.
Etxean falta direnen omenez topa egin dute Kafeatzen. Bihotz taupadak sentitu egiten dira. Geldoak izan daitezke. Azkarrak. Gaur indartsu sentitu dira, taupadaz taupada elkartasuna helarazteko. Elkartasun Egunak [abuztuak 14] maitasuna aireratu du, muga guztiak, oztopo guztiak gaindituta. Mezua garbia izan da: “Etxeratzeko bidean urratsak eman dira, baina etxeratze prozesua amaierara arte eroan behar dugu, kide guztiak geure artean, kalean egon arte”.
13:00etan puntuan atera da euskal preso, iheslari eta deportatuen eskubideen aldeko manifestazioa Alde Zaharretik, Askatasuna irakurri zitekeen pankartari jarraituz. Hori da helmuga, “urte luzez sufrimendu izugarria eragin duen eta eragiten jarraitzen duen auziari konponbidea ematea”.
Helmugara ailegatzeko nahi eta beharra adierazi dute, denak etxean, geure artean egongo diren eguna ailegatzeko premia. Eta hori guztion artean egin beharra dagoela gogorarazi dute. “Denon artean, eurekin, horrela eraikiko dugu amesten dugun Euskal Herri independente, sozialista, feminista, euskaldun eta ekologista”. Horregatik, bost hilabete barru Bilbora joatera deitu dute, urtarrilaren 9ko hitzordua “inoiz baino ezinbestekoagoa” dela azpimarratuta: “Helmuga bat gurutzatu nahi dugula irudikatu behar dugu, euskal preso, iheslari eta deportaturik gabeko Euskal Herri bat ezagutu nahi dugula aldarrikatzeko”.
Etxean falta direnen alde topa eginez amaitu da, ohi legez, goizeko ekimena, eta handik, elkartasun bazkarirako bidea hartu dute. Plazagañe bete jende batu da bazkarian, giro ezin hobean.
Mamarrazoka, esku-eskura
11:00etan ireki ditu ateak sortzaileen azokak Kafeatze pasealekuan. Jendea joan-etorrian ibili da, eta salmentak ere nahikoa ondo joan dira. Boltsak, koadroak, bitxiak, kutxak, arropak…. denetarik erosteko aukera eduki dute bertara joan direnek, eta saltzaileak “gustura” egon dira.
Eguna, baina, hasi besterik ez da egin, Gauerdira arte egongo da zegaz gozatu andramarietan. Leokadi etorriko da orduan, kortxeleko mamuak ondoan dituela, gonak ezeze, bazterrak eta kontzientziak ere astintzera. Pantaloi, tanga eta kantzontzillo lasterketagaz amaituko dira Elkartasun Eguneko ekintzak 03:00etan.
