Emozioek gainez egin dute Andra Mari Egunean
Herriari eskainitako aurreskuak eta Mutrikuko Musika Bandaren emanaldiak txiki utzi du Itsasaurreko karpa eguerdi partean. Eguraldiak hobera eginda, arratsalde-gauerako iragarritako ekimen guztiek aurrera darraite.
Andra Mari Eguneko kontzertua, Ibai Pastorren zuzendaritzapean. Andra Mari Eguna errotuta dauden usadioei lotuta ari dira ospatzen gaur [abuztuak 15] Ondarroan. Euriagaz esnatu da eguna, eta eguerdi ostera arte, horrela jarraitu du. Edonola ere, goiz parteko ekimenak aterpean egin dira, eta herritarrek ez dituzte galdu nahi izan.
Herritarrei aurreskua eskaini diete herriko agintariek 12:30ak inguruan. Ordurako, Itsasaurreko karpako aulkiak beteta zeuden. Txalo artean agurtu dituzte dantzariak eta, jarraian, Mutrikuko Musika Banda kontzerturako prestaketetan hasi da. Ibai Pastor zuzendaria gidari, ia ordutebeko erreportorio zabala eskaini dute musikariek. Ikus-entzuleek adi-adi jarraitu dituzte piezak, akordez akorde gozatu dituzte. Amaierarako, herriko abestiak laga dituzte: Guztiok Ondarru, Boga Boga, Berriz etorriko gera eta Antiguako Ama maitea.
Eguraldiak hobera eginda, arratsalderako iragarrita dauden ekintzak mantenduko dituzte: esku pilota partiduek hartuko dute frontoia Markina-Xemeingo Esku Pelota Taldearen eskutik, Artelango erraldoi eta buruhandiek hartuko dituzte kaleak, pailazoek… Eta gauean, su artifizialek argituko dute herria, kolore bizi-biziz, jaiak eurak bezala.
Gaztelu puzgarriak, kiroldegian. Gaur gertatu modura, bihar ere umeentzako gaztelu puzgarriak Zaldupe udal kiroldegian egongo dira. Erreka aldeko ateetatik sartu behar da bertara, larrialdiko eskailera dagoen parean dauden ateetatik.
